istorgia

Società da musica Scuol


 
Tenor ils statüts da l’on 1929 es la Società da musica Scuol - o co ch’ella gniva nomnada quella vouta: “Musica Gronda” - gnüda fuondada als 1. settembre 1904. Da quel on as chattettan e s’unittan ün pêr paschiunats culla intenziun da fuondar üna società da musica. Quai füt bainbod vardà, perche cha sar Armon Hartmann e sar Jon Planta han infra cuort temp chattà ün dirigent. Sar Jon Vitale es stat il prüm dirigent da nossa società. La pitschna compagnia s’ha augmantada svelt a 9 musicabts, chi faivan lur prouvas illa stüva da sar Armon Hartmann. Il capo cumünal da quella vouta, sar Baltisar Planta, ha realisà ils bsögns da la giuvna società e tils ha miss a disposiziun ün local in chasa da scoula per far las prouvas. Causa cha sar Jon Vitale es a seis temp gnü elet sco magister d’utrò ha el pudü diriger la società be dürant trais ons. Cun sar Cla Sarott ha la società gnü fich gronda furtüna: el vaiva quella vouta güsta fini seis stüdi da magister. Cla Sarott ha manà la musica in möd exemplaric dal 1904 fin dal 1947. Suot sia direcziun s’ha sviluppada la società da musica a satisfacziun da tuot la populaziun da nos cumün. Ils prüms statuts chi sun gnüts elavurats ed approvats dateschan da l’on 1905.
Cha la paschiun per far musica d’eira plü gronda sco la temma da pissers finanzials demuossa la contribuziun annala da 24 fancs,cha mincha commember activ stuvaiva pajar. La prüma producziun publica ha gnü lö dal 1904 pro la festa dal capo. I seguittan üna seria da buns ons da musica e da prosperità: dal 1912 ha la società organisà la festa da musica districtuala e dal 1913 s’ha la società as partecipada a la festa da musica chantunala a Samedan. Cun üna bindera ornada cun üna ghirlanda d’urbaja e cun gronda superbia dal seguono rang aint illa categoria gremiva sun ils musicants tuornats a chasa da lur prüma festa chantunala. Dal 1947 ha organisà la società la 12avla festa da musica chantunala. Cul agüd da tuot la populaziun esa stat pussibel da far reuschir la festa a la satisfacziun da tuots. 39 musicas cun passa 1200 musicants han fat part a las concurrenzas. Eir l’ultima festa gronda cha nossa società ha pudü organisar es statta ün grond success. Dal 1990 ha gnü lö a Scuol la festa da musica districtuala cun la partecipaziun da bleras societats da musica da l’Engiadina, da Samignun, da la Bergiaglia, dal Puschlav e da la Val Müstair.
 
Ils dirigents e lur musica
 
Ils 15 october 1947 es stat per la società da musica Scuol ün trist di. La mort dal dirigent Cla Sarott ha relaschà a tuot ils musicants da quella jada bleras algordanzas da bellas uras. Cla Sarott ha dirigi la società dürant 43 ons. Quist sacrifici e quista pazienza dal paschiunà dirigent nu sun stats invans, perche quel bun spiert ha dat forza avuonda a la società per cuntinuar cun quista bella paschiun. Al plaschair da tuot la musica s’ha il magister Balser Tall declerà pront da surtour la bachetta da la società. El ha cun quai sgürà l’existenza da la società dürant ils prossems 25 ons.Dal 1969 fin al 1972 es il numer da musicants chalà remarchabelmaing. Dürant quist temp es gnü sunà be amo per ün o tschel arrandschamaint. Dal 1972 ha il dirigent d’onur, Balser Tall, lura fat plazza ad ün dirigent giuven, a sar Otto Huber, chi d’eira dürant quel temp magister ad Ardez. Seis successur es stat dal 1974 Christoffel Caprez chi’d es amo hoz qua a Scuol magister. El ha manà la bachetta da nossa società fin dal 1986. Ad el sun seguits ils dirigents sar Gudench Barblan e sar Jachen Erni. Daspö il 1991 sta la società da musica cun grond success suot la bachetta da sar Reto Mayer. La Società da musica Scuol suna pel mumaint illa 3. categoria in fuormaziun da “fanfare mixte”. L’on da musica düra dal cumanzamaint da novembre fin als 1. avuost. I vegnan absoltas ca. 50-60 prouvas. Lapro vegnan amo divers concerts.
 
Ün per datas importantas da la Società da musica Scuol:
1904   Fundaziun da la Società da musica Scuol
1912   Organisaziun da la prüma festa districtuala
1936   Inauguraziun da l’unifuorma nouva
1947   Organisaziun da la festa chantunala
1963   Inauguraziun da l’unifuorma nouva
1979   Festa da giubileum: 75 ons Società da musica Scuol
            Inauguraziun bindera nouva ed uniforma nouva
1990   Organisaziun festa districtuala
1998   Festa d’inauguraziun unifuormas nouvas
2004   Festa da giubileum 100 ons Società da musica Scuol
2007  
Organisaziun da la festa chantunala
m